الحمد لله
الحمد لله
الحمد لله خبطنا تحت بطاطنا
يا محلا رجعة ظباطنا من خط النار
يا أهل مصر المحمية بالحرامية
الفول كتر و الطعمية و البر عمار
و العيشة معدن و اهى ماشيه آخر أشيا
ما دام جنابه و الحشاية بكروش و كتار
حتقول لى سينا و مسيناشى
ما ستميت اتوبيس ماشى شاحنين أنفار
إيه يعنى لما يموت مليون أو كل الكون
العمر أصلا مش مضمون و الناس أعمار
إيه يعنى فى العقبة جرينا و لا فى سينا
هى الهزيمة تنسينا أننا أحرار
إيه يعنى شعب فى ليل ذله ضايع كله
دا كفاية بس أما تقول له أحنا الثوار
الحمد لله ولا حولا مصرالدولة
غرقانة فى الكدب علاوله و الشعب إحتار
و كفاية أسيادنا البعدا عايشين سعدا
بفضل ناس تملا المعدة و تقول أشعار
أشعار تمجد و تماين حتى الخاين
و ان شاء الله يخربها مداين عبد الجبار
القاهرة:يونيو 1967
أحمد فؤاد نجم
التسميات: شعر سياسي
مرسلة بواسطة عود ثقاب @ أغسطس 04, 2019
1 تعليقات
