الساعد اللى بنى الأهرام

        

   الساعد اللى بنى الأهرام

                    هواه موجود

يا رب أنا اتوكلت عليك                   و رجعت إليك

ما تنسانيش أنا صنع يديك           يا رؤوف يا ودود

                  (اتحاد الأحزاب)

مين كان يقول إن الأحزاب               تصبح أحباب

لك وحدك الحمد يا وهاب             يا صاحب الجود

جاعل خلايقك ناس بتحش                 و ناس بتقش

و رحمتك من فوق بترش                  الزرع يعود 

                      *************

يعود و بعد ما كان جلاوين           يرعاه خروفين  

عيدان طويلة و تملا العين                  الله عالعود 

                     *************

كانت زريبه السنتين دول             يرعاها الصول

و يبص لك عمك جون بول               يلقاها أسود

                    *************

شدوا اللبان بزيادة كلام                و امشوا لقدام

الساعد اللى بنى الأهرام                 لسه موجود

                    ************

يخلق بدال الأنتيكة                     ميت فابريكه

ويبيع لأمة أمريكا                و بتوع فرى جود

                  *************

الدنيا كلها حسدانه                          عالجبانه

"وادى الملوك"أما نتانه              منك يا حسود

                 *************

يعنى المحبة لمواتنا                   و احنا حياتنا

و كلنا بجغرافيتنا                فى الخارطه قرود

                 *************

تزخرفونا بترتركم                      و بأحمركم

و تشغلونا فى دواركم               نلقط فى الدود

                *************

و حق من أنبته زينه                  و فتله متينه

ليتنسج منه خاكينا                 و الباقى بارود

               *************

و يتقلب شعب الوادى                كله جهادى

ما فهش عاقل و لا هادى          غير الملحود

              *************

خيوب عليا إن ما جعلها          يمشى داخلها 

م اسكندريه لشلالها            فى عمار ممدود

              *************

و النيل يمين و شمال مجراه     يخلق سافواه

و صحرة الجيزة يا ولداه       تصبح هوليود

                   ******

شغل حكومة!

عيله بناتها تمانيه و اربعه صبيان

ميت أبوهم ،وأرشدهم جدع غلبان

باع نص بيت ملك و اتوكل على الرحمن

يفتح له دكان بقاله زى بعضشيان

دفع إيجار السنه و خلو رجل كمان

جينا بقى للمساعى من ديوان لديوان

قال فهمى افندى :الرفوف تبعد عن الجدران

و حسنى افندى يقول:الحيطه ناقصه دهان

و بكرى افندى حكم بالغلق عالدكان

و قال حسين بيه حسين:الفتح فى الإمكان

عبال ما فاتت سنه فى المنح و الحرمان

ضاع رأس ماله و باع الصنجه و الميزان

                  *********

المنبوذين

يا منبوذين الهند كفكفوا دموعكم              دى مصر فيها المنبوذين ملايين

من منبوذين حافيين يلموا سبارس         و منبوذيين ماسحين جزم  دايرين

                                      و منبوذين شبان معاهم شهايد                  حرم عليهم يدخلوا الدواوين                                          و منبوذين نسوان و ضابط مباحث              داير وراهم من كمين لكمين 

ومنبوذين فى البيت عشاهم فلافل              فى العيد،و أيام السنه جايعين

و منبوذين ضايعين ما يعرف خبرهم         و نا اللى فيهم ينسمع لى أنين

                     ***          

يا غاندى يكفى الصوم تعالى بلادنا    شوف اللى فيها من زمان صايميين

أنت لقيت الملح أما الكنانه                      الملح ميرى و اللى ينهب مين

لوجيت فى وسط القوم تبقى مطاوع          و لا الزناتى كاسر الكاسرين

يا ريت تعلمنا صناعة المغازل              محلا المغازل و المنازل طين

                                        بلد دهبها انشال و دهبان حالها                و لسه فيها الأنجليز قاعدين                                                                                                                               

                                                                                                                                    الشاعر بيرم التونسى