فى المعتقل
فى المعتقل يا سلام سلم
موت واتألم
لكن لمين راح تتظلم و الكل كلاب
كلاب حراسة و كلاب صيد
واقفين بالقيد
يكتّفوا عنتر و أبو زيد
و يهينوا دياب
الكلب فيهم لا يميز
و لا يتميز
عن الغوريلا ومجهز
و بظفر و ناب
ومدربينه يدق الكعب
فوق راس الشعب
يزرع فى قلبه الخوف و الرعب
من غير أسباب
غير أن شلة حرامية و شمحطية
عايشين فى مصر عواطلية
و بياكلوا كباب
عايزين يعيشوا عرض و طول
على كدة على كده على طول
وإن حد بلضم سيدنا يقول
جريه يا كلاب
ع المعتقل يرموه فى الضيق
ما يلاقى صديق
وادارة شغلتها التلفيق
تكتب له جواب
غير الصحافة ما تهول
بقى و تأول
و بعد ما الكدب يطول
تطلع فى كتاب
لكن يا مصر حييجى اليوم
و يطير النوم
و كل ظالم او مظلوم
حيكون له حساب
معتقل القلعة:1969
أحمد فؤاد نجم
التسميات: لقد تغيرت..اعرف هذا..اشعر به
مرسلة بواسطة عود ثقاب @ أغسطس 04, 2019
1 تعليقات
1 تعليقات:
النكسة الجديدة على الأبواب فأفيقوا..الحمد لله خبطنا تحت باطاطنا مشاركة جديدة على عود جديد
إرسال تعليق
الاشتراك في تعليقات الرسالة [Atom]
<< الصفحة الرئيسية