أوهام مصرية

بتجرى ورايا ليه يا بوليس!

وأنا بجرى شعرت بأن فيه  إنسان بيجرى ورايا

بتلفت.. لقيته بوليس!

لقيت دمى هرب منى..

و فجأة خليت من الأحاسيس

لقيت لك خطوتى إختلت

لقيت لك هدمتى إبتلت

بقيت و انا بجرى بتطوح

مانيش عارف دى حاجة بجد

ولا دا نوع من الكوابيس

بتجرى ورايا ليه يا بوليس!

دانا فى حالى ..

ماليش فى الدنيا صوت و لا جسم!

دانا ناقص إذا قربت لمراتى ..

أجيب تصريح يا ناس من القسم

و ادلدل راسى و أوطى..

و فى الصيف بمشى متغطى!

واقوم  من وسط اى جماعة بتعارض ..

و لو إبليس!

بتجرى ورايا ليه يا بوليس!

دانا أصلا بخاف إنى أشترى الجرنان..

و فيه آيات بخاف أقراها فى القرآن..

و لما بفوت  على التمثال..

 بقول شيالله يا شيخ رمسيس!

بتجرى ورايا ليه يا بوليس!

و لا اعرف يعنى أيه سياسةو لا حسابات

و لا افهم يعنى أيه أحزاب ولا إنتخابات

أنا موافق فى كل مكان ..بكل رئيس

بتجرى ورايا ليه يا بوليس!

دانا عبدك و عايش عمرى محتاج لك..

أبوس أيدك ..أبوس رجلك تقول لى

عملت أيه ؟و انا أتوب

مانا عارف بإن ماضينا ..حاضرنا

و مستقبلنا ..كله عندكم مكتوب

وحتى لو غلط إغفرلى أعمل أيه؟

شيطانى خسيس

بتجرى ورايا ليه يا بوليس!

دانا لكلاب شارعنا بدفع الفردة

و خاف أسخن أكلى

باكل لقمتى باردة!

ودايما بعتبر نفسى عروسة

و الحكومة عريس

بتجرى ورايا ليه يا بوليس!

و أيه يعنى اما تبقى دى بلدكم

واحنا فيها ضيوف!

و أيه يعنى اما يبقى الحى ميت

والبصير مكفوف!

أديكوا بتسمعوا بدلنا ..و بتشوفوا بدل منشوف

و أنتوا الدنيا و أنتوا الدين

يغور الشيخ مع القسيس

بتجرى ورايا ليه يا بوليس!

و فجأة كعبلتنى الطوبة بنت الكلب

فجاة وقعت.. قربلى و ممسكنيش!

عرفت إنه ما يقصدنيش

و بصتله.. أتاريه كان بيجرى بسرعة لجل يحصل الأتوبيس!

                                                                                د.صلاح عبد الله