أمنا الغولة

الحمد لله مستورة ..و ماشية بس مقطورة

و الأعمى شايف الصورة..كله بيدفع فى فاتورة

اللى نهب و اللى أرتشى ..و اللى بالأسرارفشى

وسبنى أنام من غير عشا..و قال لى مات اللى أختشى

فصبحت فاصل مالفيشة..و شاطرألعن العيشة

و اللى على راسهم ريشة ..خلعوا البرقع و البيشة

بفساد يكسر الهمة..و الخيل بقى يجرى فى الذمة

و المجلس لابس العمة ..نتن طموحه يكون رمة

فالتطوير بقى وش جير و االتنمية رصف و تشجير

و الطب حنة و زيت جرجير و اليافطة بيع و مفيش تأجير

البيع لدواعى السفر..بعذر شيطانى اللى كفر

دول معروفين بالنفر..بس معاهم شيخ غفر

و طالبين سجانين و ترزى..و طباخ و عجانين

و رؤساء تحرير للجرانين ..بيضحوا بالأم لاجل الجنين

 لو أنت شاطرة و الأولى.. طب ليه إيديك مغلولة

و فاضية و عنى مشغولة..صبحت أمنا الغولة

فبعتى الناس الكسيبة..الرقاصات و اللاعيبة

و رجال الأعمال حبيبة..شياطين بسبحة و زبيبة

أدونى حزن من غير كرب..حبة شتيمة شبعت ضرب

و لو نص كفته و ربع طرب..أنا أروح فداكوا بس فحرب

على الأقل أموت شهيد ..زهقت من سوق العبيد

من غير لخبط و لا تهبيد ما ترشونى بأى مبيد

هى السياسة إعلانات..هوالكلام زى الرنات

مش عايزين تكسبوا حسنات.. معندكوش اخوات بنات

سرقتوا منى المحفضة ..وجيوبى فاضبة منفضة

لو زعلانين من الفضفضة

..يبقى أنتو خلق من الفضا

                                                                                                              محمد باكوس

ألف سؤال محشور فى الحلق

ألف سؤال محشور فى الحلق

هى القوانين طبخ و سلق

و لجنة و ندوة و شغل هنادوه

ما حد يرد علينا يا خلق

أمى مريضة و لا ماتت ..

عندها فرصة و لا فاتت

و لما تفيص مين هيهيص..

 و أنت قاعد و لا كاتت

فلوس الناس مين هربها.؟

.و الإمتحانات مين سربها؟

و بعنى و خانى و سبنى اغنى

 أحلف بسماها و بترابها

مانا الفقير اللى مالوش لازمة

 نفعت بس فى حرب و أزمة

من كوعى شارب و فار لتجارب..

و أفتح بوقى أخد مية جزمة

و صاحبى الواد شعبان تعبان

 و خايف يصرخ أصله جبان

فى البحر مسافر ما الجوع كافر

فهمت يا فارس بنى خيبان

دا الفساد طلعلى لسانه

و رقص حاجبه و سن سنانه

هيبش بطنى و يخرطنى

 قطع غيار تنفع علشانه

أصل انا طيب اوى و أمير

و بهضم لحم كلاب و حمير

وبقت خل و نفسى فى حل

كيلو كرامة و باكو ضمير

و حتة شقة خمسة فى ستة

فأيها داهية و أسوأ حتة

أنا مصرى مواطن مش مالباطن

متعلمتش رمى الجته

مانا غلطان ما كان مالأول

 أروح فضائية أشحت و أتسول

و أعيط ياما و احنا يتامى

فاللى يصدق شيكه يحول

 يحنوا عليا بزقه و تكه

الا العيشة ضنك و دكه

و اهو كام باكو و ابقى معاكوا

و بنسبة لكوا دا حبة فكة

الف خسارة عليكى يا حارتى

مش بتلمك إلا سيجارتى

اتخصخصتى و اتقصقصتى

دا كلام جارى و حوار جارتى

 اما شبابك صبحت شيخاه

نص بطالة و ربع مشيخاه

خفى عليهم تخدى عينيهم

حد يمرجح فى عيال دايخه

فهمتى و لا أقول من تانى

أنا ابنك ولا مش كتبانى

نظرة يا ست لعقلى يشت

ضربة فى قلبى و قطع لسانى

                                                                           محمد باكوس

                                                                           2008

قصيدة إزيك يا ريس

قصيدة إزيك يا ريس التى لا أعرف اسم مؤلفها و قد قالها فى عصر المخلوع حسنى مبارك

 لكنها مازالت مناسبة و تصلح لتقال عن عهد السيسى

بعد التحية و بعد السلام

إزيك يا ريس وإزي المدام

و قبل ما أنسى انا بشكرك

علشان يعنى بتسأل علينا

ربنا يا ريس يقدرك

ويخليك كمان لينا

شكرا يا ريس

 شكرا يا ريس على حال

الشعب كويس و فل و عال العال

الشعب واكل

معندوش مشاكل

والشباب شغال

واللى يقولك فيه بطالة

 و إن المواصلات مش شغالة

و إن الحكومة بقى حالها زبالة

و لازم تنشال

أبعتلهم بسرعة ولاد الحلال

من قفاه هيشلوه

و يكرموه و يشغلوه

فى أبو زعبل يكسر جبال

أهو أحسن من قعدة  القهاوى

و يفضل يقول كوسة و رشاوى

و يقول عليك كلام بطال

و فى الختام

منى السلام لبطلنا الهمام

بطل الوعود و كتر الكلام

و ادى القصيدة منى  اسمعوها

أنا مبخافش و هفضل أقول

 كلمة الحق عليها مسئول

إن الريس راجل طيب

و بشعبه دايما مشغول

مشغول إنه يلم فلوسنا

فى سويسرا يحوشهلنا

فى حسابات سرية بيشلهلنا

نفسه يأمن مستقبلنا

شفتوا إزاى بقى قلبه رحيم

عنده إيمان و ضميره سليم

بيجوعكوا لجل تخسوا

آه يا شعب محتاج لرجيم

من جهلكوا بتقولوا بطالة

و إن الأحوال مش شغالة

الراجل نفسه يريحكوا

 هى الراحة تبقى عوالة

اما حكاية المنتجعات

ليه بتقولوا عليها معتقلات

ليه الظن و سوء النية

نفسه يفسحكوا يا بهوات

أما الكراسى و اللى إتقال

ده كلم مش محتاج لسؤال

 الغلطة دى غلطتنا يا عالم

أحنا اللى ما جبناش كراسى تقال

و نبى أنتوا ظالمين الراجل

 ضيع عمره و مين يستاهل

حتى الأكل بياكله بدلنا

طالع واكل نازل واكل

بقى بعد ده كله ماله الريس

طبعا أنتوا عارفين من غير ماقول

و خلص الكلام و معدش له لازمه

تعبنا ماللى بيحصل قدامنا

و الباقى أنتوا عارفينه

يا ناس ..يا خلق ..يا شعب

                           

حزب طناش

اليوم ده فكره زي النهاردة

..كنا بنعلن حزب طناش

فى الركنة دي.. على القهوة دى..

ناس بالآلاف..أعضاء ببلاش!

أنا المؤسس و أنا الرئيس

..لكن يا عينى ما روحنا بلاش..,!

أنا كنت فاكره ده حزب كبير

 ما يتقفلش فوشه الباب

لكن طلعت غلط كتير

و أتقفلت كل الأبواب

و لأن اعضاءه مسلمه

محد فيهم رد جواب!

و لقيته كبر على الفاضى

 و عمره ميحل الأزمه 

و توجهه تلاقيه فاضى

وراضى بزمان الغمه

و لما اصبح حزب صحيح

 و بقيت له عازه و لازمه

كل الودان الطرشانه تركونا للدنيا الزحمه

حزب طناش مفهوش نفرين

 ..و هو كام مليون واحد

دلوقتى تركونى النفرين

..و بقيت أنا الحزب فواحد!

                                                                                     شيماء سعيد

                                                                                     يناير2004